Camau Bach

Yn nofel gyntaf Luned mae cast o gymeriadau yn byw eu bywydau amrywiol dros gyfnod o flwyddyn mewn tref fach ddienw, rhywle ar y ffin rhwng Cymru a Lloegr. Maer nofel yn plethu'r dwys a'r digri ac mae hiwmor a gobaith, ynghyd â chydymdeimlad dwfn at y cymeriadau, yn hydreiddio'r dweud.

Mae’r nofel yn dechrau wrth i ni gael ein cyflwyno i Siriol Haf; dynes breifat a dihyder yn ei thridegau sydd newydd lwyddo i brynu ei fflat fach ei hun a dianc o gartref gormesol ei rhieni gor warcheidiol. Tydi bywyd heb fod yn hawdd iddi, a hithau wedi profi siom gyrfaol a dyweddïad a ddaeth i ben disymwth. Pan fo hen ffrind ysgol yn gorfodi ei hun a’i theulu yn annisgwyl ar ei haelwyd newydd, daw Siriol i wynebu ei gorffennol a magu nerth annisgwyl.

Ymysg y cymeriadau amrywiol, bydd adlonianwr plant aflwyddiannus, gwraig gyfoethog sy’n byw i’w thŷ, derbynnydd c’nesol y sba lleol, ffermwr alpacas sydd wedi ei ddadrithio gan fyd amaeth, tylinydd blinedig, dyn busnes sy’n dychwelyd o’r Amerig i fro ei febyd, athrawes sy’n teimlo pellter at ei merch sy’n ddylanwadydd Tik Tok a gwraig weddw sy’n gorfodi ei hun ar ei theulu prysur wrth symud i’w tref.