Вандроўка ліфтам

А што, калі месцы, якія мы пакінулі, не зьнікаюць, а завісаюць дзесьці ў малочным тумане мінулага? Што, калі ўсё яшчэ можна ўвайсьці ў свой дзіцячы пакой у бацькоўскай кватэры? Высунуць шуфлядку з унівэрсытэцкімі канспэктамі? Паглядзець гісторыю званкоў у мабільніку дваццацігадовай даўніны? Пасядзець на вэрандзе дома, які згінуў у пажары? А раптам можна нават даслаць ліст з таго сьвету на гэты – і атрымаць адказ?

Югася Каляда зноў працуе з падменай жанраў. «Вандроўка ліфтам» пачынаецца як спэкулятыўная фантастыка пра будову таго сьвету – зь ліфтамі, таймлайнамі жыцьця, белым туманам і бюракратыяй, - але паступова ператвараецца ў псыхалягічны раман пра віну, згубленае каханьне, страчанае сяброўства, дурацкія памылкі маладосьці, балючыя стасункі бацькоў і дзяцей. І раптам выводзіць туды, дзе асабістае жыцьцё аднаго чалавека злучаецца зь пераломнымі падзеямі ў лёсе ўсёй Беларусі.

Дзеяньне рамана адбываецца адначасова ў Менску дзевяностых, нулявых, у дваццатым годзе – і ў тым дзіўным месцы, дзе ўжо няма ніякага часу.